«Тәуелсіздік – адамзаттың бақыты!» тақырыбында ашық тәрбие сағаты

Абай атындағы көпсалалы мектеп-гимназиясында Қазақстан Республикасының Тәуелсіздік күні мерекесіне орай ұйымдастырылған онкүндік аясында 13-желтоқсан күні 8 «Ә» сыныбында «Тәуелсіздік – адамзаттың бақыты!» тақырыбында ашық тәрбие сағаты өтті. Сабақты сынып жетекшісі Ерболат Нурсауле ұйымдастырды.

Қазақстан Республикасының тәуелсіздікке жету жолындағы айшықты ісіне шолу жасап, түсінік беру. Оқушылардың ойлау және сөйлеу мәдениетін жетілдіру. Еліне, жеріне деген сүйіспеншілігін арттыру. Тарихты бағалай білуге үйрете отырып, ұлтжанды азамат етіп тәрбиелеуді мақсат еткен тәрбие сағаты жоғары деңгейде өтті.

«Тәуелсіздік – бізге оңай келген жоқ», «Менің Отаным – Қазақстан», «Тәуелсіздік – мәңгілік елдің тұғыры» қатарлы бірнеше бөлімге құрылған сабақтың құрылымы мен мазмұны үйлесім таба отырып, көз тартар көрнекіліктері, бейнематериалдар мен презентация арқылы ұсынылған білім мазмұны оқушылардың жүрегінен терең орын алды.

«Еліміздің сан мың жылдар бойы армандаған, сол жолда ғасырлар бойы найзаның ұшымен, ерлеріміздің ерен ісімен, кешегі дүниені дүр сілкіндірген Желтоқсан оқиғасымен келген, тарихымызда алтын әріптермен жазылатын «Тәуелсіз күні» мерекесі құтты болсын!», - дей отырып ашық тәрбие сағаты өз мәресіне жетті.